తిరుమల: శ్రీవేంకటేశ్వర స్వామిని దర్శించుకునేందుకు భక్తులు భారీగా తరలిరావడంతో తిరుమలలోని ప్రధాన వీధులన్నీ భక్తులతో కిటకిటలాడాయి. వేసవి సెలవుల కారణంగా భక్తుల రద్దీ కూడా పెరిగింది. దీంతో కంపార్ట్‌మెంట్లన్నీ నిండిపోయి భక్తులు గంగమ్మ గుడి వరకు క్యూలో నిల్చున్నారు.
టోకెన్లు లేని భక్తులకు 36 గంటల్లో సర్వదర్శనం కల్పిస్తామని టీటీడీ అధికారులు వెల్లడించారు. నిన్న 79,207 మంది భక్తులు దర్శించుకోగా 41,427 మంది తలనీలాలు సమర్పించారు. భక్తులు సమర్పించే హుండీ కానుకల ద్వారా వచ్చే ఆదాయం రూ. 3.19 కోట్లు వచ్చాయని తెలిపారు.
తిరుపతిలోని శ్రీ గోవిందరాజ స్వామి ఆలయంలో మే 21 నుంచి 25 వరకు స్వర్ణ దహన విమాన గోపురం మహాసంప్రోక్షణ జరగనుంది. వార్షిక బ్రహ్మోత్సవాలు మే 26 నుంచి జూన్ 3 వరకు జరగనున్నాయి.ఈ రెండు కార్యక్రమాల ఏర్పాట్లను ఆలయంలో జేఈవో వీరబ్రహ్మం అధికారులతో సమీక్షించారు.
మహాసంప్రోక్షణకు ఈనెల 20న నాట్లు వేయనున్నట్లు తెలిపారు. ఈనెల 21 నుంచి 24వ తేదీ వరకు వైదిక కార్యక్రమాలు నిర్వహించనున్నామని ఈనెల 25న పూర్ణాహుతి, మహాసంప్రోక్షణ నిర్వహించనున్నట్లు వివరించారు.దీనికి చేపట్టాల్సిన ఏర్పాట్లపై శాఖల వారీగా అధికారులతో సమీక్షించామన్నారు. విపరీతమైన డిమాండ్ కారణంగా ఆలయంలో ఊంజల్ సేవను మే 20 నుండి 25 వరకు రద్దు చేశారు.
