ప్రధానాంశాలు
హైదరాబాద్: సోషల్ మీడియా ప్లాట్‌ఫామ్‌లలో రాహుల్ గాంధీని ‘న్యూ ఏజ్ రావణుడు’గా అభివర్ణించినందుకు బిజెపికి వ్యతిరేకంగా కాంగ్రెస్ (Congress )నాయకులు మరియు కార్యకర్తలు రాష్ట్రవ్యాప్తంగా నిరసనలు చేపట్టారు. ప్రధాని నరేంద్ర మోదీ, హోంమంత్రి అమిత్ షా, బీజేపీ దిష్టిబొమ్మలను దహనం చేశారు.
నిరసన ర్యాలీలు నిర్వహించాలని రాష్ట్ర నాయకత్వం పిలుపు..
ప్రతి అసెంబ్లీ నియోజకవర్గంలో నిరసన ర్యాలీలు నిర్వహించాలని రాష్ట్ర నాయకత్వం ఇచ్చిన పిలుపు మేరకు కాంగ్రెస్ నాయకులు, కార్యకర్తలు వీధుల్లోకి వచ్చి బీజేపీ, మోదీ, షాలకు వ్యతిరేకంగా నినాదాలు చేశారు. ఇదిలా ఉండగా, నాంపల్లిలోని బీజేపీ రాష్ట్ర కార్యాలయం వద్దకు ర్యాలీగా బయలుదేరేందుకు పార్టీ నాయకులు, కార్యకర్తలు ప్రయత్నించడంతో గాంధీభవన్ వద్ద ఉద్రిక్తత నెలకొంది.
పోలీసులు, కాంగ్రెస్(Congress ) కార్యకర్తల మధ్య తీవ్ర వాగ్వాదం..
ర్యాలీని అడ్డుకునేందుకు భారీ పోలీసు బలగాలను మోహరించారు. దీంతో పోలీసులు, కాంగ్రెస్ కార్యకర్తల మధ్య తీవ్ర వాగ్వాదం చోటుచేసుకుంది. ర్యాలీకి వెళ్లకుండా అడ్డుకోవడంతో వారు పోలీసులతో వాగ్వాదానికి దిగారు. కార్యకర్తలను అదుపు చేసేందుకు పోలీసులు స్వల్పంగా లాఠీచార్జి చేయాల్సి వచ్చింది.
రంగారెడ్డి జిల్లా యూత్ కాంగ్రెస్ అధ్యక్షుడు పి.రవికాంత్ గౌడ్, కార్యదర్శి సాము వరుణ్ తదితరులు బీజేపీ రాష్ట్ర కార్యాలయం ముట్టడికి యత్నించగా, బేగంబజార్ పోలీసులు వారిని అదుపులోకి తీసుకున్నారు.
బీఆర్ఎస్-బీజేపీ మధ్య జరిగిన రహస్య ఒప్పందం : రేవంత్ రెడ్డి
కాంగ్రెస్ కార్యకర్తలపై పోలీసుల చర్యను టీపీసీసీ చీఫ్ ఏ.రేవంత్ రెడ్డి ఖండించారు. బీఆర్ఎస్-బీజేపీ మధ్య జరిగిన రహస్య ఒప్పందంలో భాగంగానే బీజేపీ రాష్ట్ర కార్యాలయానికి ర్యాలీని బీఆర్ఎస్ ప్రభుత్వం అడ్డుకున్నదని ఆరోపించారు. రాహుల్ గాంధీని చూసి బీజేపీ భయపడుతోందని అందుకే ఆయన్ను రావణుడిగా చిత్రీకరిస్తున్నారని ఏ.రేవంత్ రెడ్డి అన్నారు.
