హైదరాబాద్: రానున్న అసెంబ్లీ ఎన్నికల్లో విజయం సాధించేందుకు పార్టీ నాయకులు, కార్యకర్తలు ఐక్యంగా పని చేయాలని కాంగ్రెస్ రాజకీయ వ్యవహారాల కమిటీ కన్వీనర్ మహమ్మద్ అలీ షబ్బీర్ పిలుపునిచ్చారు. కామారెడ్డి జిల్లాలోని అన్ని మండలాలకు నూతనంగా ఎన్నికైన అధ్యక్షులు హాజరైన సమావేశంలో ఆయన ప్రసంగించారు.
మహ్మద్ అలీ షబ్బీర్ తన ప్రసంగంలో దివంగత ముఖ్యమంత్రి డాక్టర్ వైయస్ రాజశేఖర రెడ్డికి నివాళులర్పించారు. ముస్లింలకు 4% రిజర్వేషన్లు కల్పించడానికి ఆయన చేసిన కృషిని గొప్పగా వర్ణించాడు. సుప్రీంకోర్టులో రిజర్వేషన్ల కేసును సమర్థంగా కొనసాగించడంలో ప్రస్తుత కేసీఆర్ ప్రభుత్వం విఫలమైందని విమర్శించారు.
తెలంగాణలో కాంగ్రెస్‌కు ప్రజలు అండగా ఉంటారని షబ్బీర్ విశ్వాసం వ్యక్తం చేశారు. కాంగ్రెస్ పార్టీని అధికారంలోకి తీసుకురావాలని రాష్ట్ర వాసులు ధృడనిశ్చయంతో ఉన్నారని అన్నారు. అసెంబ్లీ నియోజకవర్గాల విజయంలో మండల అధ్యక్షులదే కీలకపాత్ర అని, కామారెడ్డిలోని నాలుగు అసెంబ్లీ నియోజకవర్గాల్లో విజయం సాధించేందుకు నాయకులు, కార్యకర్తలు ఐక్యంగా కృషి చేయాలని కోరారు.
రైతులకు రూ.2 లక్షల వరకు రుణమాఫీ చేస్తామని, నిరుపేదలకు ఇళ్ల నిర్మాణానికి రూ.5 లక్షలు ఇస్తామని కాంగ్రెస్ పార్టీ హామీ ఇచ్చింది. ఆరోగ్య శ్రీ పథకం కింద రూ. 5 లక్షల వరకు వైద్య చికిత్స ఉచితంగా అందించబడుతుంది అని ఆయన ప్రజలకు వరాల జల్లులు కురిపించారు. ఈ సారి మన కాంగ్రెస్ ను గెలిపించుకోవాలి అని అన్నారు.
