హైదరాబాద్ : ఔటర్ రింగ్ రోడ్డు (ORR)లో మరో కొత్త ఇంటర్ చేంజ్ అందుబాటులోకి వచ్చింది. నర్సింగిలో రూ.29.50 కోట్లతో నిర్మించిన ORR ఇంటర్ చేంజ్ ను మంత్రి KTR ప్రారంభించారు. గ్రేటర్ హైదరాబాద్ చుట్టూ 158 కిలోమీటర్ల మేర ఉన్న ఔటర్ రింగ్ రోడ్డులో ఇప్పటి వరకు 19 ఇంటర్‌ఛేంజ్‌లు ఉన్నాయి.
నార్సింగి, కోకాపేట నియోపోలీస్, మల్లంపేట ప్రాంతాల్లో మరో మూడింటి నిర్మాణాలను HMDA చేపట్టింది. నార్సింగి ఇంటర్‌చేంజ్ పూర్తయిన తర్వాత ట్రాఫిక్‌ను అనుమతిస్తారు. ఈ నేపథ్యంలో నేడు మంత్రి కేటీఆర్ ప్రారంభించనున్నారు.
గ్రేటర్ చుట్టూ నిర్మించిన కోర్ సిటీ నుంచి ఔటర్ రింగ్ రోడ్డు వరకు కోర్ సిటీ నుంచి రాష్ట్రంలోని వివిధ ప్రాంతాలకు వెళ్లే రహదారులను రేడియల్ రోడ్లుగా గుర్తించి సిగ్నల్స్ అవసరం లేకుండా చాలా విశాలమైన ఇంటర్ చేంజ్ లు నిర్మించారు. ORRపై 19 చోట్ల నిర్మించగా, నార్సింగి వద్ద ORR మార్గంలో వెళ్తుండగా శంకర్‌పల్లి వెళ్లే మార్గంలో మాత్రమే ఫ్లైఓవర్‌ నిర్మించారు. ఇంటర్ చేంజ్ నిర్మించాల్సిన చోట ఫ్లై ఓవర్ మాత్రమే నిర్మించడంతో ఇక్కడ తలెత్తిన సమస్యకు కొత్త ఇంటర్ చేంజ్ నిర్మించినా అనేక సమస్యలు తలెత్తుతున్నాయి.
గండిపేట నుంచి వచ్చే మూసీ నదితో పాటు మెహిదీపట్నం నుంచి శంకర్‌పల్లి వెళ్లే మార్గంలో భూసేకరణ జరగలేదు. దీంతో నార్సింగి ఇంటర్‌చేంజ్ పనులకు కొంత కాలంగా సాంకేతిక ఆటంకాలు ఎదురైనా వాటిని పరిష్కరించి నిర్మాణం పూర్తి చేశారు. మొత్తం రూ.29.50 కోట్లతో నార్సింగి ORR ఇంటర్ చేంజ్ పనులు పూర్తయినట్లు HMDA అధికారులు తెలియజేశారు.
IT కంపెనీలు నగరంలో తమ కార్యకలాపాలను విస్తరిస్తున్నాయి. ముఖ్యంగా పశ్చిమ దిశగా IT కారిడార్ ప్రాంతం వేగంగా విస్తరిస్తోంది. IT కారిడార్ నుంచి శంషాబాద్ విమానాశ్రయంతో పాటు బెంగళూరు, శ్రీశైలం, నాగార్జునసాగర్, విజయవాడ వంటి జాతీయ రహదారులకు ఔటర్ రింగ్ రోడ్డు అందుబాటులో ఉంది. ORRలో మొత్తం ట్రాఫిక్‌లో సింహభాగం IT కారిడార్ నుండి వస్తుంది. ప్రధానంగా జూబ్లీహిల్స్‌, మాదాపూర్‌, మియాపూర్‌, కూకట్‌పల్లితోపాటు నానక్రాంగూడ, పుప్పల్‌గూడ, కోకాపేట, మణికొండ, నార్సింగి ప్రాంతాల నుంచి వచ్చే వాహనాల సంఖ్య గణనీయంగా పెరిగింది.
